Fjármálaráðuneytið birti nýlega  tölur um hve mikið ellilífeyrir hefði hækkað frá 1996 í samanburði við hækkun neysluverðlags. Segir ráðuneytið,að ellilaun hafi hækkað um 80%

á tímabilinu miðað við 41% hækkun neysluverðlags.Hér er beitt blekkingum. Átt er við rúmlega 300 ellilífeyrisþega,sem eru  á ”strípuðum” bótum.Aðrir hafa fengið mjög litla hækkun eða aðeins 18%. Þetta segir þó aðeins hálfa sögu,þar eð lágmarkskaup verkafólks hefur hækkað meira en neysluverðlag og því var lofað,þegar hætt var að láta  ellilífeyri hækka sjálfvirkt í samræmi við hækkun lágmarklauna, að sú breyting mundi ekki skerða kjör ellilífeyrisþega. Það loforð var svikið.

 Ellilíeyrir lækkað um 17,7 prósentustig

  Samkvæmt staðtölum Tryggingastofnunar ríkisins   2004   nam lífeyrir aldraðra,grunnlífeyrir,tekjutrygging og eingreiðsla 61,6 % af lágmarkslaunum verkafólks það ár en 1988 nam sami lífeyrir aldraðra 79,3 % af lágmarkslaunum.Lífeyrir aldraðra sem hlutfall af lágmarkslaunum hefur á þessu tímabili lækkað um 17,7 prósentustig.Árið 1995 nam ellílífeyrir 74,8% af lágmarkslaunum. Það er alveg sama hvort miðað er við 1988 eða 1995 :Það hefur orðið gífurleg skerðing á lífeyri aldraðra miðað við kjör verkafólks  á lágmarkslaunum.Þessar tölur tala sínum máli. Tölur fjármálaráðuneytis breyta þar engu um.Ellilífeyrir hefur ekki fylgt breytingum á lágmarkslaunum eins og lofað var 1995 af stjórnvöldum.

Skattbyrði eldri borgara hefur aukist

Auk þess bætist það við, að skattar á  lægstu laun hafa hækkað á þessu tímabili.Áður greiddu ellilífeyrisþegar engan skatt af tekjum sínum en í dag verða þeir að greiða háa skatta

Skattbyrði þeirra,sem hafa lægstu tekjurnar hefur aukist um 9,2 -15,3 prósentustig  á tímabilinu 1994-2004.Á sama tímabili hefur skattbyrði þeirra,sem hafa meðaltekjur aukist um 3,2-7,2 prósentustig og þeirra,sem hafa hæstu tekjur um 1,9-3,3 prósentustig.Af þessu er ljóst,að ríkisstjórnin  hefur verið að þyngja skattana á láglaunafólki og eldri borgurum,sem hafa einungis ellilaun og lítinn lífeyri.

Kaupmáttur ráðstöfunartekna hefur breyst sem hér segir á tímabilinu 1990-2005: Hámarkslífeyrir eldri borgara ( kaupmáttur ráðstöfunartekna) hefur aukist um 18% en kaupmáttur allra í landinu hefur aukist um 50,6%. Eða m.ö.o.: Á  sama tíma og kaupmáttur almennings hefur aukist um rúm 50% hafa eldri borgarar verið skildir eftir og þeir hafa aðeins fengið þriðjung þeirrar kaupmáttaraukningar sem almenningur hefur fengið!

Eldri borgarar fá skattafslátt erlendis

 Mörg ríki veita eldri borgurum  skattafslátt með sérstökum skattleysismörkum fyrir ellilífeyrisþega.Þessi ríki verðlauna eldri borgara.Hér er þeim refsað.

 Lífeyrissjóðirnir voru stofnaðir til þess að bæta kjör íslenskra launamanna. Þeir áttu að veita lífeyrisþegum myndarlega viðbót við lífeyri frá almannatryggingum. En reynslan hefur orðið sú,að ríkið hrifsar til sín meirihlutann af því,sem lífeyrisþegar eiga  að fá eða 70%,sem ríkið tekur í skatta og skerðingar.Er ekki kominn tíma til  að leiðrétta ranglætið?

Björgvin Guðmundsson

Birt í Fréttablaðinu 15.júní 2006