Steingrímur Hermannsson, fyrrverandi forsætisráðherra, gagnrýnir Framsóknarflokkinn harðlega í athyglisverðu viðtali ,sem birtist við hann 3.oktober sl í Blaðinu.Steingrímur segir: “ Mér finnst Framsóknarflokkurinn hafa verið um of verkfæri Sjálfstæðisflokksins.”
Láta íhaldið ráða ferðinni
Þetta eru eftirtektarverð ummmæli.Ég hefi bent á þetta sama í mörgum greinum mínum,t.d. hvernig Framsókn lét Sjálfstæðisflokkinn ráða ferðinni í Íraksmálinu og þegar Þjóðhagsstofnun var lögð niður. En þegar fyrrverandi formaður Framsóknarflokksins segir þetta sama hljóta menn að leggja við hlustir og sjá að þetta er rétt.
Steingrímur segir: “ Þegar ég ólst upp í Framsóknarflokknum heyrði ég mikið talað um félagshyggju,samhjálp og velferðarkerfi,sem byggði á félagshyggju. Þessi orð heyrast varla nefnd í dag..Ég spyr mig stundum: Hver er hugsjónin?
Á móti græðginni
Steingrímur gagnrýnir græðgisþjóðfélagið og segir,að menn séu jafnvel farnir að boða að græðgi sé nauðsynleg til þess að efnahagslífið blómstri. “ Þetta vil ég ekki samþykkja.Við þurfum að standa gegn græðginni.”Steingrímur gagnrýnir einnig ráðgerðar skattalækkanir og segir,að stjórnmálamenn eigi ekki að lækka skatta þegar þeir geti ekki séð fyrir þörfum fólksins.Þá gagnrýnir hann einnig eftirlaunalögin,sem hækkuðu eftirlaun stjórnmálamanna. Einnig gagnrýnir Steingrímur stefnu ríkisstjórnarinnar í umhverfismálum og efnahagsmálum. Hann segir,að stjórnina vanti hugsjón og stefnu á sviði umhverfismála.
Er Steingrímur orðinn jafnaðarmaður?
Þegar viðtalið við Steingrím er lesið sést,að furðumikið í skoðunum hans er samhljóða skoðunum jafnaðarmanna í Samfylkingunni. Steingrímur gagnrýnir græðgina og misskiptinguna í þjóðfélaginu en það er einmitt rauði þráðurinn í málflutningi og stefnu Samfylkingarinnar. Og hann gagnrýnir Framsókn fyrir þjónkun við Sjálfstæðisflokkinn.Steingrímur Hermannsson er mjög merkur stjórnmálamaður. Hann er síðasti formaður Framsóknarflokksins,sem hélt tryggð við hina gömlu stefnu Framsóknar,samvinnustefnu og félagshyggju. Núverandi forysta Framsóknarflokksins hefur varpað þeirri stefnu fyrir róða og tekið upp ómengaða íhaldsstefnu. Það er einmitt þess vegna sem stjórnarsamstarf Framsóknar og Sjálfstæðisflokksins hefur staðið svo lengi. Það er vegna þess,að Framsókn fylgir stefnu Sjálfstæðisflokksins í einu öllu. Þetta á við um einkavæðingu,þetta á við í skattamálum og þetta á við í félagsmálum.Það hefur haft forgang að lækka skatta atvinnurekenda og hátekjumanna.Og í félagsmálum hafa félagsleg gildi verið látin lönd og leið Félagslegas íbúðakerfið lagt niður og níðst á öldruðum og öryrkjum í kjaralegu tilliti.
Björgvin Guðmundsson
Birt í Fréttablaðinu 13.oktober 2005
