Ný styttist í næstu þingkosningar og þá er eðlilegt, að athugað sé hvað hefur verið efnt af kosningaloforðunum.Stærsta kosningaloforð Samfylkingarinnar var fyrirheitið um það að fyrna aflaheimildir, innkalla þær, á 20 árum og úthluta aftur á sanngjarnan og réttlátan hátt. Hvernig hefur það loforð verið efnt? Það hefur algerlega verið svikið. Í stað þess að innkalla aflaheimildir smátt og smátt á 20 árum eins og lofað var, hafa verið flutt stjórnarfrumvörp um að festa hið illræmda kvótakerfi í sessi og úthlutun samkvæmt því .Lagt hefur verið til, að handhafar kvótanna fengju þeim nær öllum úthlutað til 20 ára og lengri tíma.Með þessu háttalagi er verið að hundsa kjósendur gersamlega.Það er verið að gera þveröfugt við það, sem lofað var.Það er eins og ráðamenn haldi, að kjósendur séu svo illa að sér, að unnt sé að bjóða þeim hvað sem er. Og til þess að kóróna ósómann hefur því verið haldið fram af vissum talsmönnum ríkisstjórnarinnar, að með þessu væri verið að framkvæma fyrningarleiðina: Allur kvótinn væri innkallaður á einu bretti og honum úthlutað öllum á ný! Það er slæmt, þegar ekki er komið hreint fram.Það er búið að samþykkja umbótaáætlun í Samfylkingunni og samkvæmt henni á að umgangast kjósendur af heiðarleika. Þessi vinnubrögð eru ekki í samræmi við þá áætlun.

 

 

Frumvarp Steingríms J.Sigfússonar um að afhenda kvótakóngunum nær allan kvótann til yfir 20 ára náði ekki afgreiðslu fyrir sumarleyfi sl. vor.Það mál er enn óafgreitt.Nokkrir þingmenn Samfylkingarinnar munu enn halda fast við fyrningarleiðina eða ígildi hennar. Mörður Árnason og Valgerður Bjarnadóttir fluttu breytingatillögu við fiskveiðistjórnarfrumvarpið um, að fyrningarleiðin yrði farin og síaukið uppboð aflaheimilda.Ég er ánægður með það.En mér skilst, að ekki sé nægilegur stuðningur við fyrningarleiðina í þingflokki Samfylkingarinnar þó þeirri leið hafi verið lofað fyrir þingkosningarnar 2009. Því verður að finna nýja leið að mínu mati. Sú leið er uppboðsleiðin. Ég tel, að allir ættu að geta sameinast um uppboðsleiðina, þ.e. að setja aflaheimildirnar á uppboðsmarkað og láta greiða markaðsverð fyrir þær eins og stjórnlagaráð hefur lagt til.Það mætti gera þetta í áföngum, t.d. 3-4 áföngum.Draga ætti inn aflaheimildirnar í áföngum og setja þær smátt og smátt á uppboðsmarkað, t.d. 1/4 eða 1/3 í fyrsta áfanga og svo koll af kolli. Þá fengju útgerðarmenn og handhafar kvótanna tíma til þess að aðlaga sig að breytingunum.Ákveðið magn kvóta ætti að setja í potta fyrir landsbyggðina eins og rætt hefur verið um.

 

 

En stóra málið er, að ekki kemur til greina að afhenda kvótakóngunum kvótana til 20 ára eða lengri tíma. Það væru alger svik við kosningaloforðin og sennilega stærstu svik við kjósendur,sem framin hafa verið. Stjórnarflokkarnir geta bjargað sér út úr þessu máli með því að setja kvótana á uppboðsmarkað.Það er hvort sem er engin samstaða um þær tillögur,sem liggja fyrir í stjórnarfrumvarpi.Það verður ekki minni samstaða um að setja kvótana á uppboðsmarkað. En það er skynsamlegasta leiðin úr því sem komið er. Ég skora á stjórnarflokkana að fara þá leið.

 

Björgvin Guðmundsson

 

Birt í Morgunblaðinu 12.oktober 2012