Össur Skarphéðinsson,formaður Samfylkingarinnar, hefur skýrt frá því,að hann  muni taka  það upp á Alþingi,að rannsakað verði hvernig íslensk stjórnvöld tóku ákvörðun um að láta Ísland styðja innrás Bandaríkjanna   og Bretlands í Írak. Vill Össur láta rannsaka hvort  utanríkisráðherra fékk upplýsingar um,að gereyðingarvopn væru í Írak. Hann vill,að athugað verði hvort ríkisstjórnin öll tók ákvörðun um að styðja innrásina eða hvort ákvörðun var aðeins tekin af forsætisráðherra og utanríkisráðherra og jafnvel aðeins  í símtali milli þeirra.

Rannsóknarnefnd?

Össur Skarphéðinsson segir,að annað hvort megi fela utanríkismálanefnd umrædda rannsókn  eða skipa sérstaka rannsóknarnefnd á Alþingi eins og  lög geri ráð fyrir.

Heimasíðan fagnar  þessari ákvörðun Össurar. Hér á heimasíðunni hefur margoft verið rætt um nauðsyn þess að fram færi rannsókn á því hvernig ákvörðun var tekin um að styðja innrás í Írak. Málið var hvorki lagt fyrir utanríkismálanefnd né rætt á Alþingi áður en  ákvörðun var tekin. Er þar um lögbrot að ræða,þar eð skylt er að leggja öll mikilvæg utanríkismál fyrir utanríkismálanefnd.

Össur segir,að Samfylkingin muni leita samráðs við aðra stjórnarandstöðuflokka um  umrædda rannsókn. Er  ekki að efa að samstaða næst um málið. Stuðningur ríkisstjórnar  Íslands við innrásina í Írak hefur sætt gagnrýni í öllum stjórnarandstöðuflokkunum.

Björgvin Guðmundsson