Ríkisstjórnin skýrði frá samningaviðræðum við Bandaríkin um varnarmál 25.september. Helstu atriðin höfðu áður lekið út: Bandaríkin hreinsa ekki upp eftir sig,heldur skilja eftir mengun á Keflavíkurflugvelli,þar á meðal olíumengun og sorpmengun.Íslendingar taka við öllum fasteignum á Keflavíkurflugvelli og þurfa að rífa niður um helming þeirra með miklum tilkostnaði. Það heitir svo að Íslendingar fái mannvirkin frítt en verði á móti að hreinsa upp eftir varnarliðið. Það eru slæm skipti. Bandaríkjamenn ákváðu sjálfir að fara héðan og þeir gátu ekki farið með mannvirkin með sér. Þeir urðu að skilja þau eftir og höfðu enga stöðu til þess að biðja um greiðslu fyrir þau. Íslendingar  áttu því að gera kröfu til þess að Bandaríkjamenn hreinsuðu upp eftir sig. Það veit enginn hvað hreinsun á Keflavíkurflugvelli kostar. Það geta verið mjög háar upphæðir.

 Engar varnir í  landinu

 Aðalatriðið í nýafstöðnum samningaviðræðum eru þó varnir landsins. Þær verða engar. Herinn er farinn og eftir stendur aðeins í samkomulaginu við Bandaríkin, að þeir muni senda herlið hingað, ef á þarf að halda vegna einhverrar ógnar.Allir vita, að með nútíma tækni  geta erlendir hryðjuverkamenn verið komnir hingað  fyrirvaralaust og jafnvel erlendir herir. Bandaríkjamenn verða ekki komnir hingað  nægilega fljótt, ef slíkt ástand skapast. Það er lítið gagn í óljósu ákvæði um einhverja bandaríska varnaráætlun sem enginn veit um nema ef til vill 2 ráðherrar. Nær hefði verið að semja við NATO um stöðugt eftirlit hér á landi með herflugvélum og öðrum viðbúnaði. Skuldbinding Bandaríkjanna um að verja Ísland felur lítið meira í sér en skuldbinding NATO um að verja þau aðildarríki,sem á er ráðist.

Björgvin Guðmundsson