Um hvað verður kosið í næstu þingkosningum? Að mínu mati verður kosið um aukinn ójöfnuð í þjóðfélaginu,aukna misskiptingu og skattaáþján hinna lægst launuðu.Það verður kosið um kjaraskerðingu aldraðra og öryrkja síðustu 12 árin.Virtir fræðimenn,Þorvaldur Gylfason prófessor og Stefán Ólafsson prófessor hafa sýnt fram á það með tölum, að ójöfnuður hefur aukist mikið í þjóðfélaginu á undanfarandi áratug, þ.e. á valdatíma núverandi stjórnarflokka. Ójöfnuður hefur ekki aukist eins mikið í neinu öðru landi Vestur-Evrópu.Þetta er til skammar fyrir Ísland. Áður en núverandi stjórnarflokkar tóku við völdum var ójöfnuður tiltölulega lítill hér á landi og Ísland gat státað af því meðal þjóðanna, að jöfnuður væri mikill hér. En Sjálfstæðisflokknum og Framsóknarflokknum hefur tekist á rúmum áratug að gerbreyta þjóðfélaginu í þessu efni. Og hvernig hefur þetta gerst. Jú, þetta hefur einkum gerst á eftrifarandi hátt: Ranglátt kvótakerfi hefur fært gífurleg verðmæti til tiltölulega fárra í þjóðfélaginu.Skattastefnan hefur lækkað skatta á þeim ríkustu en hækkað þá á þeim lægst launuðu.Raunar hafa skattar hækkað á 90% skattgreiðenda.Skattar hafa hækkað á öldruðum. Aldraðir og öryrkjar hafa verið sviknir um réttmætar kjarabætur. Kjör þeirra hafa versnað í samanburði við kjör láglaunafólk. Því var lofað 1995, þegar sjálfvirk tengsl milli lífeyris þessa fólks og lágmarkslauna voru rofin, að sú breyting mundi ekki skerða kjör þeirra en það var svikið. Á þeim tíma, sem liðinn er síðan hafa 40-50 milljarðar verið hafðir af öldruðum og öryrkjum.Það er krafa aldraðra og öryrkja, að þeim verði skilað því, sem af þeim hefur verið haft,einnig þeim fjármunum,sem
þeir áttu að fá til framkvæmda úr framkvæmdasjóði aldraðra en ríkisvaldið hefur tekið úr sjóðnum til eyðslu.

35 milljarðar hafðir af skattgreiðendum

Ef skattleysismörkin hefðu fylgt launavísitölu frá 1988 væru þau í dag 130 þúsund á mánuði en þau eru nú tæp 80 þúsund og verða 90 þúsund á mánuði frá næstu áramótum. Jóhanna Sigurðardóttir alþingismaður segir,að þetta muni 35 milljörðum. Ríkisstjórnin hefur sem sagt haft 35 milljarða af skattgreiðendum með því að láta skattleysismörkin ekki fylgja launavísitölu eins og eðlilegt hefði verið. Árið 1995 nam tekjuskattur einstaklinga 10% þjóðarframleiðslunnar en árið 2003 var þetta hlutfall komið í 14,9%. Stefán Ólafsson prófessor hefur kannað hvernig skattbyrði fólks með mismunandi tekjur hefur breytst á tímabilinu 1994-2004.Eftirfarandi kemur í ljós: Skattbyrði tekjulægstu 10%( fjölskyldna), þ.e. með meðaltekjur 163 þúsund á mánuði hefur aukist um 14% á þessu tímabili (í % stigum).Skattbyrði næstu 10% með meðaltekjur 244 þúsund á mánuði hefur aukist um 15%. Og skattbyrði þar næstu 10%,með meðaltekjur 308 þúsund á mánuði hefur aukist um 11,7%. En skattbyrði tekjuhæstu 10% hefur minnkað um 3,3% eða um 464 þúsund á ári. Skattbyrði tekjulægstu 10% hefur aukist um 275 þúsund á ári. Þessar tölur tala sínu máli. Skattbyrði þeirra lægst launuðu hefur stóraukist á sama tíma og skattbyrði þeirra tekjuhæstu hefur stórlækkað. Samtímis hefur skattur á fyrirtækjum verið lækkaður eða í 18% en skattur á einstaklingum er 36%. Það sýnir í hnotskurn stefnu ríkisstjórnarinnar: Launafólk er skattpýnt en fyrirtækjum hlíft í sköttum.Græðgisstefnan hefur verið allsráðandi en félagshyggja á undanhaldi.
Það er kominn tími til þess að koma ríkisstjórn ójafnaðar,misskiptingar og skattpíningar frá völdum.

Björgvin Guðmundsson

Birt í Morgunblaðinu 9.desember 2006