Steingrímur J.Sigfússon formaður Vinstri grænna gagnrýnir harðlega það, sem hann kallar utanstefnur hinar nýju.Þar á hann við það,að erlendur  auðhringur skuli kalla á íslenskan ráðherra  til New York til þess að tilkynna honum og öðrum fulltrúum Íslands hvað auðhringurinn hafi ákveðið varðandi byggingu nýs álvers á Íslandi.Undir þessa gagnrýni Steingríms skal tekið hér. Þetta er mjög ósmekklegt og hefur ekki tíðkast áður.Eðlilegra hefði verið,að fjallað væri um þessi mál á Íslandi. Og Íslendingar eiga sjálfir að ákveða þau skilyrði,sem þeir vilja setja fyrir byggingu álverksmiðja á Ísland. Þeir eiga ekki að taka við boðskap erlendra aðila þar um.

 Algert sjónarspil

Svo virðist sem íslensk stjórnvöld hafi ákveðið að setja á svið sjónarspil varðandi næstu álverksmiðju  á Íslandi.Margir aðilar á Íslandi vilja nú fá til sín nýja álverksmiðju. En það er ekki rúm í íslenska hagkerfinu fyrir allar þessar verksmiðjur og það er heldur ekki til orka fyrir þær allar.En ríkisstjórnin lætur eins og  allir geti fengið álverksmiðju.Og til þess að halda blekkingaleiknum áfram bregður ríkisstjórnin á það ráð að setja á svið mikið sjónarspil í New York. Fulltrúar Skagafjarðar,Akureyrar og Húsavíkur eru boðaðir þangað ásamt iðnaðarráðherra og fulltrúum ráðuneytisins!Til hvers var verið að boða  fulltrúa þriggja héraða á Norðurlandi til New York. Jú,til þess að láta þá halda að þeir væru allir inni í myndinni enda þótt Alcoa væri fyrir löngu búið að ákveða að hafa nýja álverksmiðju við Húsavík.Og þessir fulltrúar allir voru boðaðir til New York til þess að  ríkisstjórnin gæti þvegið hendur sínar og sagt: Það er  Alcoa,sem ákveður staðsetninguna. Við ráðum engu þar um!Og til hvers er verið að sviðsetja leiksýningu um byggingu álverksmiðju einhvern tímann í framtíðinni? Það er blásið í lúðra í New York og skrifað undir eitthvert plagg um að “athuga eigi” með byggingu álverksmiðju við Húsavík.Þetta er fáránlegt.Hvers vegna þarf að skrifa undir plagg um athugun? Að sjálfsögðu geta allar erlendar álverksmiðjur athugað möguleika á byggingu álverksmiðja hér á landi.Það þarf ekki undirskrift í New York um það. Það hefur engin  ákvörðun verið tekin um byggingu nýrrar álverksmiðju á Norðurlandi.Málið er enn á athugunarstigi. Ef til kemur verður ekki byrjað á þessari álverksmiðju fyrr en eftir 4 ár. Þetta er því algert sjónarspil.

   Björgvin Guðmundsson