Sérkennilegar umræður eiga sér stað hér á landi um þessar mundir.Deilt er um það hvort forseti Íslands geti neitað að staðfesta lög og vísa þeim til þjóðarinnar. Og nú hefur bætst við sú staðhæfing að forsetinn sé vanhæfur til þess að synja undirskrift vegna tengsla við Norðurljós. Ólafur Jóhannesson lagaprófessor og fremsti sérfræðingur okkar í stjórnskipunarrétti sagði,að forsetinn væri aldrei vanhæfur.Ýmsir lögfræðingar benda á,að forsetinn þurfi ekki að taka afstöðu til fjölmiðlalaganna þó hann neiti að skrifa undir og vísi þeim til þjóðarinnar. Hann geti einfaldlega ákveðið að vísa þeim til þjóðaratkvæðagreiðslu án þess að taka sjálfur afstöðu til laganna.

  Í umræðunni um fjölmiðlafrumvarpið hafa talsmenn ríkisstjórnarinnar sagt,að frumvarpinu væri ekki stefnt gegn Norðurljósum. Frumvarpið væri almenns eðlis og ætti að gilda um langa framtíð. En nú allt í einu er talið skipta máli hvort forsetinn hafi haft tengsl við forstjóra Norðurljósa. Það skiptir að sjálfsögðu engu máli, þar eð vanhæfisreglur gilda ekki um forseta lýðveldisins. Og ef forsetinn ákveður að vísa málinu til þjóðarinnar er það vegna þess,að mikil gjá virðist hafa myndast milli þings og þjóðar í þessu máli. Mikill meirihluti þjóðarinnar virðist andvígur frumvarpinu en meirihluti Alþingis virðist samt ætla að keyra frv. í gegn.