Í síðustu skoðanakönnun Gallup um fylgi flokkanna fór fylgi Samfylkingar niður í 26% en VG fóru upp í 17 %,upp fyrir Framsókn. Ýmsir Samfylkingarmenn telja,að ekki sé ástæða til þess að hafa áhyggjur af þessu. Þetta sé eðlileg sveifla milli mánaða.

Ég er ekki sammála  því. Enda þótt skoðanakannanir séu ekki það sama og kosningaúrslit gefa þær vísbendingu um fylgissveiflur og í úrslitum þeirra felast  ákveðin skilaboð. Ég tel,að skilaboðin nú séu þau til Samfylkingarinnar,að hún hafi ekki verið nægilega skelegg í baráttu fyrir róttækum  stefnumálum og gegn ríkisstjórninni. Ef til vill hefur Samfylkingin sveigt stefnu sína of mikið inn að miðjunni. Að vísu verður Samfylkingin að sækja fylgi  bæði frá vinstri og inn á miðju ef hún ætlar að verða stór jafnaðarmannaflokkur eins og þeir gerast í Svíþjóð,í Bretlandi og í Þýzkalandi. En ef Samfylkingin slakar á í baráttunni fyrir róttækum stefnumálum jafnaðarmanna þá taka VG róttæka fylkið. Ef til vill eru VG að gera það núna. Samfylkingin verður að draga lærdóm af þessu.

Björgvin Guðmundsson