Árið 1995 voru rofin sjálfvirk tengsl milli lífeyris aldraðra frá Tryggingastofnun og lágmarkslauna verkafólks.Fram að þeim tíma hækkaði lífeyrir aldraðra sjálfvirkt þegar laun verkafólks hækkuðu.Þegar hin sjálfvirku tengsl voru rofin sagði þáverandi forsætisráðherra,að kjör aldraðra yrðu ekki skert við þessa breytingu.En það  fór á annan veg. Lífeyrir aldraðra hefur  stöðugt rýrnað í samanburði við  lágmarkslaun verkafólks.Lífeyrir aldraðra hefur dregist aftur úr í launaþróuninni.

  Hvað hefur mikið verið haft af öldruðum sl. 11 ár vegna þess,að  sjálfvirku tengslin milli lífeyris og launa voru rofin?Hvað hefðu aldraðir átt að fá mikið meira í sinn hlut á þessu tímabili, ef lífeyrir þeirra hefði alltaf hækkað í samræmi við lágmarkslaun? Það er engin smáupphæð. Aldraðir hefðu átt að fá 40 milljörðum króna meira í sinn hlut, ef tengslin hefðu ekki verið rofin. Það eru miklir peningar. Þetta er sú upphæð,sem ríkisstjórnin hefur haft af öldruðum. Það verður að gera þá kröfu,að ríkisstjórnin skili öldruðum þessari fjárhæð. Ríkisstjórnin verður að skila öldruðum 40 milljörðum króna.Þetta er meirihluti Símapeninganna. Aldraðir áttu sem sagt að fá meirihlutann af Símapeningunum.

 Krafan í dag er þessi: Lífeyrir aldraðra verði strax hækkaður um 17000 krónur á mánuði. Síðan verði  “gamla skuldin” greidd smátt og smátt. Ef til vill væri skynsamlegt að  byggja hjúkrunarheimili fyrir aldraða fyrir gömlu skuldina.Aðalatriðið er að ríkið geri upp við aldraða.

Björgvin Guðmundsson