Powell utanríkisráðherra Bandaríkjanna hefur nú viðurkennt opinberlega,að  ekki sé víst,að “sönnunargögn” þau,sem hann lagði fyrir Öryggisráð Sþ. vegna Íraksstríðsins hafi verið rétt  eða að þau hafi staðist.Gögnin,sem  Powell  lagði fram áttu að sanna,að Írakar hafi  haft búnað til þess að framleiða efnavopn og að þeir hafi átt yfir gereyðingarvopnum að ráða. Gögn þessi dugðu ekki til að sannfæra Öryggisráðið.Ráðið féllst ekki á að réttlætanlegt væri að gera innrás í Írak

.

Bush dregur einnig í land

 Áður hefur Bush Bandaríkjaforseti einnig dregið verulega í land í sambandi við Íraksstríðið.Segja má,að Bandaríkin,CIA og þingið hafi viðurkennt að Írakar hafi ekki haft yfir gereyðingarvopnum að ráða. En gereyðingarvopnin voru  helsta ástæðan fyrir innrásinni í Írak. Það er því alveg ljóst,að innrásin í Írak var gerð  á fölskum forsendum. Þetta hafa margir aðilar í Bandaríkjunum nú  viðurkennt.

En íslensk stjórnvöld berja áfram hausnum  við steininn.Þau segja áfram,að innrásin í Írak hafi verið nauðsynleg. Það er sama þó Bandaríkin sjálf viðurkenni,að engin gereyðingarvopn hafi verið í Írak. Íslensk stjórnvöld láta samt ekki segjast.

Íslenskar flugvélar til Afganistan

Íslensk stjórnvöld tilkynntu fyrir skömmu mjög hróðug,að þau munu senda  íslenskar flugvélar með  gögn og búnað til Afganistan. Einnig væri send aðstoð til Íraks. Hér er verið að efna loforðið sem  íslenskir ráðherrar gáfu Bush á ráðherrafundi Nato í Prag. Þar lofuðu þeir,að íslenskar flugvélar yrðu lánaðar til  hergagnaflutninga til Írak og alls varið 300 millj. ísl. kr. í því skyni. Mikil mótmæli urðu í landinu vegna þessa loforðs íslenskra ráðherra. Ástþór Magnússon sendi varúð með tölvupósti út um allan heim vegna þessa. Varð það ásamt almennum mótmælum til  þess að íslenskir ráðherrar hættu við að lána  íslenskar flugvélar í hergagnaflutninga. En hér var um mikið glappaskot íslenskra ráðamanna að ræða.