Kosningaskjálftinn segir til sín.Ríkisstjórnin dregur nú fram hvert málið á fætur öðru, sem hentar vel að  flagga  rétt fyrir kosningar.Eins og Ólafur Ólafsson formaður Landssambands eldri borgara (LEB) hefur bent á vill ríkisstjórnin aðeins tala við eldri borgara á 4ra ára fresti, þ.e. rétt fyrir kosningar. Í samræmi við það skammtaði ríkisstjórnin í sumar eldri borgurum einhverri hungurlús, sem fyrst og fremst gagnaðist aðeins 400 ellilífeyrisþegum Eftir það sögðu ráðherrar, að búið væri að leysa málefni eldri borgara. Ólafur Ólafsson formaður LEB er þó á annarri skoðun. Og nú kemur ríkisstjórnin með útspil í verðlagningu matvæla, sem þó á ekki að taka gildi fyrr en 1.mars n.k. Merkilegt, að ríkisstjórnin láti ekki málið taka gildi daginn fyrir kosninga! En það er augljós kosningalykt af þessu. Ríkisstjórnin hefur haft 11 ½ ár til þess að lækka matarverð en hefur alltaf neitað því allan þann tíma. Rannveig Guðmundsdóttir,þingmaður Samfylkingarinnar, hefur flutt tillögur um lækkun matvælaverðs á hverju ári undanfarin 4 ár en ríkisstjórnin hefur lítið viljað gera með þær.  Nú fyrir skömmu flutti Samfylkingin mjög ítarlegar og vandaðar tillögur um að lækka matarreikning heimilanna um 200 þúsund á ári. Lækka átti virðisaukaskatt, vörugjöld og tolla. Þegar þessar tillögur komu fram rak ríkisstjórnin upp mikið öskur og fordæmdi tillögurnar og taldi þær árás á  bændur. Landbúnaðarráðherra tók harða afstöðu gegn tillögunum. Geir Haarde forsætisráðherra hafði einnig verið mjög neikvæður gagnvart lækkun virðisaukaskatts og taldi, að slík lækkun mundi ekki skila sér til neytenda. Framkvæmdsastjóri bændasamtakanna réðist með óbótaskömmum að formanni Samfylkingarinnar vegna tillagnanna og taldi þær árás á bændur. Nú kemur ríkisstjórnin með tillögur sem ganga í sömu átt enda þótt þær gangi ekki eins langt og tillögur

Samfylkingarinnar. Tillögur ríkisstjórnarinnar lækka matarreikninginn um 120 þúsund á ári eða aðeins rúman helming af tillögum Samfylkingarinnar. Ljóst er, að  vegna þrýstings Samfylkingarinnar hefur ríkisstjórnin látið undan síga og talið  sig nauðbeygða að flytja tillögur um lækkun matvælaverðs. En tillögur ríkisstjórnarinnar ganga ekki nærri nógu  langt. Matvælaverð er í dag 40% hærra  hér en matvælaverð í löndum Evrópusambandsins. Þó verðið lækki um 16% eins og ríkisstjórnin segir er matvælaverð hér eftir sem áður allt of hátt

Björgvin Guðmundsson

Birt í Fréttablaðinu 23.nóvember 2006

Birt í Morgunblaðinu 31.oktober 2006