Ýmsir talsmenn Sjálfstæðisflokksins tala mjög fjálglega um stjórnarforustutímabil Sjálfstæðisflokksins frá 1991 og segja,að aldrei hafi verið annar eins uppgangur á Íslandi,aldrei hafi verið eins mikill hagvöxtur. Slíkar yfirlýsingar  má t.d. heyra reglulega hjá talsmanni Sjálfstæðisflokksins á Útvarpi Sögu.En er þetta rétt? Svarið er nei.Undanfarin ár hefur  að vísu verið góðæri hér á landi.En þó hefur hagvöxtur aðeins verið hóflegur miðað við fyrri hagvaxtarskeið.Á tímabilinu 1991-1995 var enginn hagvöxtur hér á landi enda hafði þá verið  samdráttur í aflaheimildum,allt frá 1988.Eftir 1995 byrjaði uppsveifla hér,sem hélst í hendur við almenna uppsveiflu efnahagslífs Vesturlanda.En ef litið  er á hagvöxt á Íslandi 1996-2000 í samanburði við önnur OECD ríki  kemur í ljós,að hagvöxturinn hér á þessum tíma  er aðeins  nálægt meðallagi hagvaxtar OECD þjóða. Á þessu tímabili er Ísland í 7.sæti OECD ríkja að því er hagvöxt varðar.

SLAKUR HAGVÖXTUR 1991-2002

Ef litið er á hagvöxt áratugsins 1991-2002, þ.e. áratug stjórnarforustu Sjálfstæðisflokksins, kemur í ljós,að meðaltals hagvöxtur á ári á mann er tæp 2% á þessu tímabili.. Á þessum áratug er hagvöxtur á Íslandi slakur miðað við hagvöxt annarra OECD þjóða. Ísland er í 16.sæti OECD ríkja á þessu tímabili! Af þessu sést, að það stenst ekki,sem talsmenn Sjálfstæðisflokksins hafa sagt,að  hér hafi þá verið meiri uppgangstími en  áður og meiri hagvöxtur en í öðrum ríkjum OECD.Staðreyndir leiða allt annað í ljós.

  MESTUR UPPGANGUR 1971-1980

Það þarf að fara allt aftur til tímabilsins 1971-1980 til þess að finna mesta uppgangstímann í efnahagsmálum. En á því tímabili jókst hagvöxtur um rúm 5% ,þ.e. meðaltals hagvöxtur á ári á mann. Og á því tímabili jókst kaupmáttur um 5,7% á ári,þ.e. kaupmáttur ráðstöfunartekna á mann,meðalbreyting á ári.En kaupmáttur  ráðstöfunartekna sl. áratug ( 1991-2002),þ.e. meðalbreyting á ári á mann,  hefur aðeins  aukist um 1,8%.Er það mikið minni aukning en  á áratugnum 1971-1980. Þetta eru staðreyndir málsins.Sjá nánar á heimasíðu minni: www.gudmundsson.net  Goðsögnin um afrek Sjálfstæðisflokksins  í efnahagsmálum á stjórnartíma flokksins frá 1991 stenst því ekki. ( Tölur um hagvöxt og aukningu kaupmáttar eru byggðar á skýrslu Stefán Ólafssonar prófessors frá 2003)

  HVER KOM MEÐ FRELSIÐ?

Talsmenn Sjálfstæðisflokksins guma  einnig  mikið af því,að Sjálfstæðisflokkurinn hafi innleitt frelsið í íslenskt viðskiptalíf. En það er einnig rangt. Það var EES –samningurinn sem færði okkur frelsið.Ég segi ekki,að við höfum fengið EES-samninginn sendan á telefax frá Brussel. En  frelsið kom alla vega frá Brussel,þ.e. frá Evrópusambandinu. Sjálfstæðisflokkurinn var í fyrstu algerlega á móti því,að Ísland gerðist aðili að EES og ef Sjálfstæðisflokkurinn hefði mátt ráða værum við ekki aðilar að EES samningnum.Það þurfti harða baráttu á Alþingi til þess að koma EES samningnum í gegnum þingið. Alþýðuflokkurinn hafði forustu í baráttunni fyrir aðild Íslands að EES og hafði sigur í þeirri baráttu.

EINKAVÆÐING BANKANNA

 Sjálfstæðisflokkurinn má hins vegar þakka sér einkavæðingu bankanna enda þótt ekki megi á milli sjá hvor stjórnarflokkanna hafi verið ólmari í  þá einkavæðingu. Framsókn, áður flokkur samvinnustefnunnar, hefur keppst við að koma bönkunum í einkaeign.Einkavæðingin  er efni í aðra grein og verður fjallað um hana síðar.

Björgvin Guðmundsson

viðskiptafræðingur

Netfang: [email protected]

Birt í Mbl. 3.mars 2004

(Sjá súlurit um hagvöxt með greininni "Mestur hagvöxtur  í  tíð Ólafs Jóhannessonar ..............."